英雄與美人（上）
二十歲嗰年，我遇上生命中最完美嘅愛情。
嗰陣我仲係一個MK妹，叫做生得幾靚，冇咩目標，打吓散工咁。
有一次，我去做拳擊比賽嘅啦啦隊，有一個叫阿邦嘅拳手特別犀利，據講佢已經連勝咗好多場，好有希望成為拳王。
我望多佢兩眼，大隻陽光，望落好有型。
或者，女人心中都有對英雄嘅崇拜，我都忍唔住為佢歡呼多幾聲。
我以為，阿邦係賽場上嘅英雄，我哋嘅接觸只限於嗰一剎那嘅歡呼。
但之後我去廁所，行行吓，見到阿邦坐埋一邊，拎住支藥油，想捽背脊但隻手唔夠長。
威風凜凜嘅英雄，忽然間變得咁笨拙，我忍唔住笑咗出聲，一句話衝口而出：「我幫你丫。」
「吓，唔好。」阿邦呆一呆，面都紅晒：「我唔係話你唔好，我係……」
「你唔係未來拳王咩？做咩一個人喺度捽油？」我哋傾咗幾句。
夜晚我收工，俾一班飲醉酒嘅流氓騷擾，慌亂之際，阿邦好似英雄咁出現。
班流氓見自己人多，伸手去推阿邦：「大隻就大晒啊？」
結果可想而知，我都未睇清楚阿邦嘅動作，幾個流氓已經被打敗，嚇到一哄而散。
「嘩，你好犀利啊，果然係拳王！」我忍唔住拍手。
阿邦有少少尷尬：「咁樣唔算，佢哋都冇練過，我勝之不武……」
冇幾耐，我就做咗佢嘅女朋友，跟佢去打比賽，睇住佢好似雄獅一樣打低對手。
強壯勇敢、年輕有為、有正義感又有義氣，呢種男人去邊度搵？
最難得嘅，阿邦好純樸，咩壞習慣都冇。
佢帶過我去拳館，佢同六個師兄弟都係孤兒，自細俾師父收養，一齊練武，阿邦就係武功最高嗰個。
六個陽光正氣嘅男仔一齊叫我「阿嫂」，嘻嘻，都幾滿足到我嘅虛榮心。
然後，阿邦成為拳王，拎到一大筆獎金，喺頒獎台上向我求婚。
所有人歡呼起鬨，嗰一刻，我覺得我係全世界最幸福嘅女人。
一切如此美好，英雄同美人終成眷屬。
我哋計劃好晒，用筆獎金結婚買樓，再將間拳館裝修靚啲，阿邦就開始收徒弟，打多幾年比賽就退役做教練。
但結婚後，阿邦嘅師弟喺拳擊比賽中受咗傷，需要醫藥費。
阿邦面有難色咁同我講，想挪用我哋嘅未來基金。
「嗰啲都係你比賽嘅獎金，應用就用啦。」我好理解，唔通叫佢睇住師弟去死咩。
嗰陣我甚至諗，假如阿邦連呢啲錢都唔捨得，佢就唔係我愛嘅英雄。
但跟住落嚟嘅發展，出乎我嘅意料。
阿邦嘅師弟全身癱瘓，錢好似流水咁花出去。
呢筆數唔係阿邦一個人負擔，其他師兄弟都想盡力夾錢，只係佢哋冇乜錢。
於是，有個師兄去咗打黑拳，即係嗰啲冇乜規則、務求刺激嘅地下拳賽。
跟住佢整親個頭，本來以為只係小傷，點知傷咗個腦，成個人傻咗。
大家焦頭爛額，阿邦更加搏命打比賽想賺錢，我就要照顧兩個傷者嘅起居。
然後阿邦嘅師父過咗身，臨終前將間拳館交畀阿邦。
阿邦同我講，一切都會好，七師兄弟傷咗兩個啫，佢哋五個一齊努力，點都搞得掂。
嗯，我都係咁諗。
直到第三個師弟受傷，佢傷得冇咁重，只係傷咗隻腳，冇得再打拳。
令人絕望嘅係，健全嘅師兄弟，開始退縮。
有一個話：「阿嫂，我年紀大啦，想轉行啦。」仲有兩個漸漸消失。
重點唔係佢哋打唔打拳、轉唔轉行，而係佢哋逃避，唔想再照顧受傷嘅三個師兄弟。
一個癱、一個傻、一個瘸。
阿邦果然係我認定嘅英雄，佢毫不猶豫，承擔起呢份毫無希望嘅責任。
佢話：「大家一齊長大，唔通我睇住佢哋死咩？」
我哋冇錢買樓啦，不過生活都要繼續。
三個師兄弟住喺拳館，阿邦除咗打拳，就係上去照顧佢哋。
本來想請個看護嘅，但開支實在太大，所以平時靠瘸嗰個師弟，勉強處理生活起居。
阿邦年紀漸大，體力下滑，已經冇辦法再喺比賽中獲勝，獎金收入愈嚟愈少。
我都搵咗份工，幫補家計，但我開始有怨氣。
佢哋嘅醫藥費、生活費、復康費就好似一個無底洞一樣，無論我哋幾努力，都只係填緊無底洞，唔會令我哋夫妻嘅生活變得更好。
我曾經同阿邦投訴過，但佢堅持呢個係佢嘅責任，我只可以無聲抗議，冇再去拳館。
阿邦冇再比賽，之後轉咗做拳擊教練，收入都唔錯。
我皺眉：「你間拳館破破爛爛，咁都有人嚟學拳？」
「話晒我都係拳王，點都有啲人氣嘅。」阿邦笑一笑，隱約有幾分當年嘅神采。
下集：https://bit.ly/2ZlFWOh
全裸社會：https://goo.gl/icuZqs
我與食人者不得不說的故事：http://bit.do/fmSWG
#短故 #短篇 #小說 #陳美濤 #廣東話 #粵語 #tomatochan #英雄與美人
Search